Оқытылатын тілде сапалы ауызша және жазбаша қарым-қатынас жасау қабілетін құру, кәсіби қызметке бет бұра отырып, лексикалық қорды үнемі байыту. Оқу үрдісінде лексикалық-грамматикалық құзыреттілікті қалыптастыруға қарағанда коммуникативті компонентке басымдық беру. Сапалы лингвистикалық елтану құзыреттілігін қалыптастыру.

Заманауи технологиялар ағылшын тілін оқыту әдістерін айтарлықтай өзгерте түсірді. Duolingo немесе Babbel сияқты тіл үйренуге арналған қолданбалы қосымшалар  арқылы кез келген уақытта интерактивті сабақтарды оқып, жаттығулар жасауға болады. Coursera және Udemy сияқты онлайн платформалар әртүрлі деңгейлер мен дағдыларға бейімделе алатын оқу курстарын ұсынады. Ағылшын тіліндегі подкасттар мен фильмдер сияқты бейне және аудио материалдар тыңдалым және айтылым дағдыларын жақсартуға мүмкіндік береді. Сонымен қатар виртуалды тіл алмасу және онлайн-репетиторлар ана тілі ағылшын тілі болып табылатын тұлғалармен бірге тілді үйренуге мүмкіндік береді, бұл тілді тиімді меңгеруге ықпал етеді.

2024 жылы тіл оқытуда тіл ортасына тереңдеуге және тілді белсенді қолдануға негізделген әдістер ерекше танымал бола бастады. Оқушыларды әртүрлі мәнмәтінде тілмен белсенді түрде әрекеттестіре отырып, тіл ортасына толығымен тереңдету әдісі тілді жетік меңгеруге көмектеседі. Жасанды интеллект қолданылатын бейімделгіш платформалар мен қосымшалар оқушының білім деңгейі мен әлсіз жақтарын ескеріп, әрқайсысының деңгейіне лайықты жеке жаттығулар ұсынады. Виртуалды және кеңейтілген жасанды әлемге негізделген әдіс-тәсілдер интерактивті тілдік ортаны құру саласында танымал бола бастады. Сондай-ақ әртүрлі әдістерді біріктіріп қолдану да маңызды: ағылшын тілінде кітап және мақала оқу, фильмдер мен сериалдар көру, ана тілі ағылшын тілі болып табылатын адамдармен тілдесу арқылы сөйлеу тәжірибесін қолдану және грамматикалық жаттығуларды орындау.

Ағылшын тілін үйрену кезінде уәжді (мотивацияны) сақтау алға қойылған мақсат-мүдделерді үнемі жаңартып отыруды талап етеді. Оның бір әдісі – нақты және қол жеткізуге болатын мақсат қою. Мысалы, ағылшын тілінде белгілі бір кітапты оқып шығу немесе белгілі бір оқу курсын меңгеру. Оқу жетістіктерін үнемі бақылап отыру тілдің қаншалықты жақсы меңгеріліп жатқанын көруге және оқу ынтасын жоғалтып алмауға көмектеседі. Сондай-ақ тіл оқуды қызықты ете білу де маңызды: яғни, ұнайтын фильмдер көру, музыка тыңдау немесе қызықтыратын хоббимен әуестену арқылы сүйікті тақырыптарды ағылшын тілінде меңгеру. Тілдік клубтарға қатысу немесе басқа білім алушылармен қарым-қатынас жасау сияқты әлеуметтік аспектілер де тілге деген қызығушылықты сақтап, оқуды жалғастыру үшін қосымша ынта мен шабыт береді.

А.Қабден, ШҚО Мәдениет басқармасының Шығыс Қазақстан лингвистикалық орталығының ағылшын тілінің оқытушысы