Келер жылы Славский жағалауы мен Пермитин көшесін қосатын көпір астындағы жол салынуы мүмкін, деп хабарлайды Buqara.kz сайтының тілшісі.

Көпір жанындағы бес көше түйісетін айналма жолда кептеліс пен жол көлік-оқиғалары жиі болады. Бұл инфрақұрылымдық нысанды әрбір қала тұрғыны асыға күтуде. Өскемен қаласы әкімінің айтуынша, жобаны одан әрі іске асыру Қаржы министрлігінің қаржыландыруына байланысты.
– Бұл жол өскемендіктерге қажет. Себебі бұл Ертіс көпірі маңындағы айналма жолдағы кептелістерді 20 пайызға азайтады. Тұрғындар «ADK» сауда орталығынан немесе Пермитин көшесі арқылы Славский жағалауына емін-еркін шыға алады. Сондықтан бұл жобаны ертерек аяқтау керек. Жоба бойынша экологтардың, Ертіс бассейндік инспекциясының, табиғат қорғау прокуратурасының – барлығының келісімі бар. Менің ойымша, бүгінде бұл салынуы тиіс басты нысандардың бірі. Өкінішке қарай, биыл жоба құрылысын аяқтай алмадық, –  деді Жақсылық Омар.
Естеріңізге сала кетейік, бүгінде жаңа жобаның іргетасын қалау басталған, нақты айтқанда жолды таспен толтыру аяқталды. Ендігі қалғаны – тегістеп, асфальт төсеу. Бірақ жоба қаржыландырудың болмауына байланысты тоқтап тұр. Құрылысты аяқтау үшін тағы 2,5 миллиард теңге қажет. Қала бюджетінде бұндай сомадағы қаржы жоқ. Әкімнің айтуынша, облыстан немесе республикадан көмек қажет.
– Жыл басында өтініш берілді. Сәйкесінше, құрылысты қаржыландыруға уәде де берілді. Бірақ уәде биыл жүзеге аспады. Қаржы министрлігі 2025 жылы жобаны қаржыландырып, жол құрылысы аяқталады деген үміттеміз, – дейді әкім.

Фотосурет: https://yk-news.kz/