Өскемендегі ірі 22 кәсіпорынның 15-інде ауа сапасын бақылайтын құрылғы орнатылмаған, деп хабарлайды Buqara.kz сайтының тілшісі, kaz.inform.kz-ке сілтеме жасап.

Шығыс Қазақстан облысының әкімі Ермек Көшербаев Үкімет отырысында осындай дерек келтірді.

— Бүгінде қаладағы 22 ірі кәсіпорынның 7 жетеуінде ғана ауаға тасталатын шығарындылардың мөлшері туралы деректі өңдейтін құрылғы орнатылған. Біз осы датчик орнатпаған кәсіпорындармен жұмысты күшейтеміз. Құрылғыны жақын арада орнатпаса, материалдарын сотқа береміз, — деді Ермек Көшербаев.

Сондай-ақ ол Шығыс Қазақстандағы ең ірі кәсіпорындардың бірінде тексеру басталғанын айтты.

— Прокуратура органдары уәкілетті ұйымдармен бірге, бірнеше облыстан мамандар тарта отырып «Қазцинк» ЖШС-інде кешенді тексеру жүргізіп жатыр. Ол тексерудің қорытындылары қоғамға таныстырылады. Тексерудің алдын ала мәліметтері бойынша кәсіпорынмен экологияны жақсартуға арналған шараларды ақылдасып жатырмыз, — деді облыс әкімі.