Зайсан көлінде, Ертіс өзені мен Бұқтырма су қоймасында мекен ететін суқұзғындар саны артуда, деп хабарлайды Buqara.kz сайтының тілшісі. 

Бұл мәселені жуырда өткен жалпы отырыста ҚР Сенатының депутаты Лұқбек Тұмашинов көтерді.
- Соңғы жылдары бұл құстың саны миллионға дейін жеткен. Құс тек Зайсан, Марқакөл, Бұқтырма су қоймаларында ғана емес, ірілі-ұсақты өзендерде де бағалы балық түрлерімен қоректенуде. Бір күнде ересек құс бір келіге дейін балық жейді, олар балық шаруашылығына зиян келтіреді, - деді депутат.
Жыл сайын Шығыстағы су айдындарын балықпен қоректендіруге қомақты қаражат жұмсалады. Ал жыртқыш құстар санының тез өсіп келе жатқаны балықтар мен шабақтардың 30%-ға дейін санын азайтады. Өйткені олар негізінен құртшабақпен қоректенеді. Лұқбек Тұмашинов ҚР Ауыл шаруашылығы министрлігі өкілдеріне суқұзғындарын ату арқылы ғана мәселе шешілетінін айтты.