Ауданда «Заң және тәртіп» идеологемасын іске асыру аясында қоғамдық қауіпсіздікті қамтамасыз ету және төтенше жағдайлардың алдын алу бағытындағы жүйелі жұмыстар жалғасуда, деп хабарлайды Buqara.kz сайтының тілшісі.

Жазғы демалыс кезеңінде азаматтардың қауіпсіздігін қамтамасыз ету мәселесіне жергілікті атқарушы органдар құқық қорғау және төтенше жағдайлар қызметтерімен бірлесіп ерекше көңіл бөлуде.

29 мамырда аудандық прокуратураның бастамасымен жергілікті атқарушы органдардың, полиция бөлімінің және төтенше жағдайлар басқармасы қызметкерлерінің қатысуымен Бұқтырма су қоймасы мен Хамир өзенінің жағалауында профилактикалық рейд өткізілді.

Іс-шараның негізгі мақсаты — судағы жазатайым оқиғалардың алдын алу, тұрғындардың құқықтық мәдениетін арттыру және азаматтардың қауіпсіздік ережелерін сақтауға деген жауапкершілігін қалыптастыру.

Рейд барысында уәкілетті орган өкілдері демалушылар арасында кең көлемде түсіндіру жұмыстарын жүргізді. Аудан тұрғындары мен қонақтарына су айдындарындағы қауіпсіздік қағидаларын сақтау, суға шомылу кезіндегі сақтық шаралары, шағын көлемді су көліктерін пайдалану және су маңындағы демалыс кезіндегі қауіпсіздік талаптары түсіндірілді.

Әсіресе, жабдықталмаған жерлерде суға түсуге жол бермеу, кәмелетке толмаған балаларды ересектердің қарауынсыз қалдырмау, су жағасында демалу кезінде алкогольдік ішімдіктерді тұтынудың алдын алу мәселелеріне ерекше назар аударылды.

Профилактикалық акция аясында азаматтарға қауіпсіздік ережелері мен төтенше жағдай туындаған кездегі іс-қимыл алгоритмі көрсетілген ақпараттық жадынамалар таратылды. Сонымен қатар жағалаудың ең көп баратын аумақтары тексеріліп, демалушылармен, балықшылармен және жүзу құралдарының иелерімен профилактикалық әңгімелер жүргізілді.

Жергілікті атқарушы органдардың сөзінше, мұндай іс-шаралар жазатайым оқиғалардың санын азайтуға ғана емес, қоғамдық тәртіпті нығайтуға, азаматтардың өз қауіпсіздігі мен айналасындағылардың қауіпсіздігіне деген жауапкершілігін арттыруға бағытталған.

Бұл бағыттағы жұмыстар жазғы маусым бойы тұрақты түрде жалғасатын болады.

Алтай ауданының прокуратурасы тұрғындар мен қонақтарды судағы қауіпсіздік ережелерін қатаң сақтауға, балаларды қараусыз қалдырмауға және заң талаптарына жауапкершілікпен қарауға шақырады.