Жаңа оқу жылына дайындық барысында мектеп асханалары тексеріліп, бірқатар санитарлық талаптың сақталмағаны анықталды, деп хабарлайды Buqara.kz сайтының тілшісі.

Жаз айларында санитарлық-эпидемиологиялық бақылау органдары облыстағы 315 мектеп асханасына мониторинг жүргізген. Тексеру барысында асханалардың ішкі әрлеуінің санитарлық талаптарға сәйкес келмеуі, ас үй жабдықтары мен ыдыс-аяқтардың жеткіліксіздігі сияқты бірқатар кемшілік анықталған. Сонымен қатар желдету жүйелерін тазалау және дезинфекциялау жұмыстарына қатысты қажетті құжаттардың болмағаны белгілі болған. Анықталған кемшіліктерді жою үшін мектептерге 258 тапсырма берілді.
– Жаңа оқу жылына дайындық аясында берілген барлық тапсырма белгіленген мерзімде орындалды, – деп хабарлады ШҚО Санитариялық-эпидемиологиялық бақылау департаменті өкілдері.
Департамент мәліметінше, қыркүйек айынан бастап мектеп асханаларына жоспарлы тексерулер жүргізіле бастады. Оның барысында зертханалық зерттеу үшін дайындалған тағамдардан сынама алынады. Мәзірдің белгіленген талаптарға сәйкестігі және мектеп асханаларында пайдалануға тыйым салынған өнімдердің бар-жоғы тексеріледі.

Қандай өнімдерге тыйым салынған?

Қолданыстағы санитариялық талаптарға сәйкес, мектеп асханаларында бірқатар тағам мен өнімдерді өндіріп, сатуға жол берілмейді. 

Олардың қатарында:
- қышқыл сүт өнімдері, сүзбе және айран;
- құймақ, көк түсті макарон, форшмак, желе және паштеттер;
- креммен толтырылған кондитерлік өнімдер, қапталған тәттілер, шоколад, кәмпиттер және печенье;
- жемісті сусындар, квас, газдалған және тәттілендірілген алкогольсіз сусындар;
- энергетикалық сусындар, қойылтылған шырындар, дәрілік және емдік-асханалық минералды сулар;
- қуырылған тағамдар, қуырылған және шала пісірілген жұмыртқалар;
- қаймақ пен майонез;
- окрошка және құрамында төрттен астам ингредиенті бар күрделі салаттар;
- үй жағдайында дайындалған тағамдар және тез дайындалатын құрғақ концентраттардан жасалған тағамдар;
- гамбургер, хот-дог, пицца, наггетс, картоп чипсы;
- хош иістендірілген тұздалған крутондар, ащы тұздықтар, кетчуп және ащы дәмдеуіштер.

Санитариялық-эпидемиологиялық бақылау органдары ата-аналардың шағымдары негізінде мектеп асханаларына жоспардан тыс тексеру жүргізе алады. Алайда мұндай тексеру санитариялық-эпидемиологиялық талаптардың бұзылғанын растайтын нақты негіздер мен дәлелдер болған жағдайда ғана жүргізіледі. Ал анонимді шағымдар бойынша жоспардан тыс тексеру жүргізілмейді.