Өскемен қалалық № 2 сотының ақпаратынша, Б. есімді азаматша көпшілік алдында билік өкілін қызметтік міндеттерін орындау кезінде қорлаған, деп хабарлайды Buqara.kz сайтының тілшісі. 

Анықталғандай, 22 қыркүйек күні тәртіп бұзушы әйел Красин көшесі № 8/1 үйдің маңында көпшілік алдында полиция капитаны С.-ны балағат сөздермен кемсіткен. 
– Оның әрекеті бейнежазбамен, жәбірленушінің жауабымен және тергеу әрекеттерінің құжаттарымен расталды. Әйел өз кінәсін мойындап, жеңіл жаза тағайындауды сұрады. Бұл ҚК-нің 378-бабы 2-бөлігіне сәйкес теріс қылықтар санатына жатады, – делінген мәліметте.
Нәтижесінде сот азаматша Б.-ға 80 сағат мерзімге қоғамдық жұмыстарға тарту түрінде жаза белгіледі.
Үкім заңды күшіне енген жоқ.