Аудан тұрғындары Қазақстан халқы Ассамблеясының құрылған күні мен Алғыс айту күнін салтанатты түрде атап өтті, деп хабарлайды Buqara.kz сайтының тілшісі.

Осы күні Қазақстан халқы Ассамблеясы мен Алғыс айту күні бір уақытта тойланады. Бұл - халықтар арасындағы бірлік пен татулықты нығайтуға, сондай-ақ ұлтаралық ынтымақтастықты дамытуға бағытталған маңызды мереке.

Қазақстан халқы Ассамблеясы 30 жыл бұрын құрылды, осы уақыт ішінде елдің қоғамдық-саяси жүйесінің маңызды бөлігіне айналды. Ассамблея ұлтаралық келісімді нығайту және қоғамдық татулықты қалыптастыруда маңызды рөл атқарып келеді. Ассамблеяның бастамасымен елдегі барлық этностың мәдениеті мен тілін сақтау және дамыту бағытында үлкен жұмыстар атқарылуда.

Үлкен Нарын ауданының Достық үйі Қазақстан халқы Ассамблеясының 30 жылдығына орай «Бірлік пен келісім жолындағы 30 жыл» атты фестиваль өткізді. Бұл фестивальге Достық үйінің этномәдени бірлестіктері, вокалдық және би ұжымдары, ауылдық округтердің мектептері мен клубтары қатысып, өз өнерлерімен көрермендерді қуантты. Мерекелік шара барысында қатысушылардың шығармашылығы, таланты және оларды ұлтаралық келісімді сақтау мен қоғамдық бірлікті нығайтуға қосқан үлесі ерекше атап өтілді.

Достық үйімен тығыз ынтымақтастық орнатып, ұлтаралық келісімді нығайту мен жалпыұлттық бірлікті қамтамасыз ету жолында елеулі үлес қосқан белсенді азаматтар марапатталды.