Кондитерлік – тек кәсіп емес, бұл өнер мен шабыттың тоғысқан нүктесі. Тәттілер әлеміне қадам басқан әр жан өзінің ерекше қолтаңбасын қалдыруға тырысады. Қамыр мен қантты ғана емес, махаббат пен жан жылуын да араластыра отырып, көздің жауын алатын, дәмімен баурап алатын өнімдер жасалады. Үздіксіз ізденіспен, талғаммен жұмыс істеудің арқасында отандық кондитерлік өнімдер сапа мен әсемдік жағынан әлемдік деңгеймен иық тірестіре бастады. Осы саланың қыр-сыры, қазіргі тұтынушы талғамы және кондитер болудың шынайы бет-бейнесі жөнінде кондитер Мөлдір Сайлауханқызымен сұхбаттасқан болатынбыз.

– Алдымен өзіңізді таныстыра кетсеңіз…

– Есімім Мөлдір Сайлауханқызы. Өскемен қаласында эксклюзивті торттарды жасайтын кондитермін.

– Өз бизнесіңізді бастау идеясы қайдан келді?

– Бизнесті бастау идеясы декреттік демалыста жүрген кезде келді. Бұл кезең – өмірімдегі ең ерекше әрі жауапты сәттердің бірі болды. Бала тәрбиесіне көңіл бөле отырып, өзіме және арман-мақсаттарыма да уақыт табуға тырыстым. Осы уақыт ішінде ішкі шығармашылық әлеуетім оянып, бұрын-соңды байқалмаған қабілеттерімді таныдым. Жаңа нәрселерге деген қызығушылық, қаржылық тәуелсіздікке ұмтылыс және өзімді жаңа қырынан танығым келген құлшыныс маған өз ісімді бастауға түрткі болды. Декрет – тек демалыс емес, ол өзін дамытуға, жаңа идеялармен шабыттанып, үлкен істерге бастау жасауға берілген бірегей мүмкіндік екенін түсіндім.

– Кондитерлік салада қанша уақыт жұмыс істеп келесіз?

– 8 жылдан асты. Осы уақыт ішінде түрлі тәтті өнімдерді әзірлеу, безендіру және жаңа рецепттер жасау бағытында мол тәжірибе жинадым. Торттар, кекстер, печеньелер мен әралуан десерт дайындауда өз қолтаңбамды қалыптастырдым. Жоғары сапа мен ерекше дәм үйлесімділігіне әрқашан баса назар аударамын. Клиенттердің сұранысына сай өнім әзірлеу, шығармашылық тәсілмен жұмыс істеу менің басты қағидаларымның бірі.

– Алғашқы өнімдеріңіз қандай болды?

– Әуелде жұмысымды қарапайым торттардан бастаған едім. Көбінесе туған күндерге арнлаған тәттілерді дайындадым. Бүгінде ерекше, эксклюзивті торттар жасаймын.

– Шабытты қайдан аласыз? Жаңа торт немесе десерт ойлап табу үшін не істейсіз?

– Мен шабытты шетелдік кондитерлердің әсем әрі ерекше етіп жасалған торттарына қарап аламын. Олар қолданатын түрлі дәмдердің үйлесімі мен текстуралардың үйлесімділігі мені жаңа идеяларға жетелейді. Жаңа десерттер ойлап табу үшін бірнеше дәмнің үйлесімін мұқият зерттеп, тәжірибе ретінде жасап көремін. Осы арқылы өз шығармашылығымды дамытып, бірегей әрі дәмді десерттер ұсына аламын деп ойлаймын.

– Кәсіпкерлік жолыңызда ең үлкен мотивацияңыз не болды?

– Жолдасымның маған деген сенімі мен берік қолдауы кәсіпкерлік жолдағы ең үлкен мотивациям болды. Оның әрқашан мені түсініп, қолдап, қиын сәттерде жанымнан табылуы өзіме деген сенімділікті арттырды. Осы сенім мен қолдау арқасында мен алға ұмтылып, қиындықтарды жеңуге батылдық таптым және жаңа белестерді бағындыруға күш-жігер жинадым.

– Бизнесті нөлден бастау қаншалықты қиын соқты?

– Кәсіпті нөлден бастау мүмкін емес – қалай болғанда да алғашқы жарна немесе бастапқы капитал керек болады. Бастапқы қаражатсыз идеяны жүзеге асыру, құрал-жабдық сатып алу немесе қызмет көрсету үшін қажетті жағдайды жасау өте қиын. Сондықтан кез келген кәсіпкер алдымен осы алғашқы инвестицияны тауып, оны тиімді әрі мақсатты пайдалана білуі маңызды. Алғашқы жарна бизнестің негізін қалаушы алғашқы қадам, ол арқылы сенімділік пен тұрақтылық қалыптасады және әрі қарай даму үшін мүмкіндіктер қалыптасады.

– Алғашқы клиенттерді қалай таптыңыз?

– Алғашқы клиенттер көбінесе OLX және Instagram сияқты әлеуметтік желілер мен онлайн платформалар арқылы келеді. Бұл құралдар бизнесті жылдам танытуға, кең аудиторияға жетуге және тікелей клиенттермен байланыс орнатуға мүмкіндік береді. Әсіресе, қазіргі цифрлық дәуірде әлеуметтік желілердің рөлі өте маңызды. Сондықтан осы платформаларды тиімді пайдалану арқылы алғашқы сатылымдарды жүзеге асырып, тұтынушылардың сенімін арттыруға болады.

– Қандай қателіктерден сабақ алдыңыз?

– Бұл сала үздіксіз қаржылық инвестицияларды талап етеді: әрдайым қажетті құрал-жабдықтарыңды толықтырып, жаңартып отыру қажет. Көбінде жұмыс үдерісін жақсарту мен сапаны арттыру үшін тұрақты түрде шығындар жұмсалатындықтан, кей кездері қажеті жоқ немесе аса маңызды емес заттарды да сатып алуға тура келеді. Осындай сәттерде қаржыны тиімді пайдалану мен дұрыс жоспарлау маңызды, өйткені кәсіпті дамыту жолында күтпеген шығындар мен қосымша қажеттіліктер туындай береді.

– Қандай өнімге тапсырыс жиі келеді?

– Баланың туған күніне арналған торттарға тапсырыстар жиі түседі. Себебі ата-аналар балалар мерекесін ерекше әрі есте қаларлықтай өткізу үшін тәттілерге ерекше көңіл бөледі. Әсіресе, балалардың сүйікті кейіпкерлері мен түрлі жарқын дизайндағы торттарға сұраныс көбейеді.

– Алдағы уақытта қандай жаңа өнімдер немесе жобалар жоспарлап отырсыз?

– Ерекше және бірегей той торттарын ойлап шығарсам деймін. Мақсатым – әрбір тойды ерекше атмосферамен толықтырып, клиенттеріме тек дәмі ғана емес, сонымен қатар көрінісі мен стилі арқылы да есте қалатын ерекше десерттер ұсыну. Жаңашыл идеялар мен заманауи технологияларды қолданып, әртүрлі тақырыптарға сай сәнді әрі талғампаз торттар жасау арқылы өз кәсібімді одан әрі дамытқым келеді.

– Басқа қалаларға жеткізу ойыңызда бар ма?

– Маңайдағы жақын қалалардан тапсырыс түссе апарамын. Мысалы, Семей қаласынан жастардың ерекше той торттарына жиі тапсырыс түседі. Тортты жеткізіп, тойда өзім ортаға алып шығып жастарға өз қолыммен ұсынамын.

– Ісін енді қолға алған кондитерлерге қандай кеңес берер едіңіз?

– Оларға ең бірінші айтар кеңесім – міндетті түрде кәсіби білім алу керек. Құнарлы әрі сапалы өнім жасау үшін теориялық білім мен практикалық дағдыларды қатар меңгеру өте маңызды. Бұл салада табысты болу үшін рецептураларды дұрыс түсіну, жаңа технологияларды игеру және сәндік безендіру әдістерін үйрену қажет. Сонымен қатар, үздіксіз өзін-өзі дамыту мен тәжірибе жинау арқылы ғана өз шеберлігіңді шыңдап, нарықта бәсекеге қабілетті маман бола аласыз. Сондықтан білім мен шеберлікке инвестиция салу – бұл кәсібіңнің негізі әрі табыстың кепілі.

– Сіздің ойыңызша, табысты болу үшін қажет басты үш қасиет қандай?

– Табысты болу үшін қажет басты үш қасиет – адалдық, жауапкершілік және тазалық. Адалдық – клиенттермен сенімді қарым-қатынас орнатып, сапалы өнім мен қызмет ұсынудың негізі. Жауапкершілік — өз ісіңе толыққанды көңіл бөліп, уақтылы және сапалы орындау арқылы кәсіби бедел қалыптастыруға септігін тигізеді. Ал тазалық – әсіресе тағам өндірісінде ең маңызды талаптардың бірі. Себебі ол өнімнің қауіпсіздігі мен тұтынушының денсаулығын қамтамасыз етеді. Осы үш қасиетті бірлесе ұстанған кәсіпкер ғана тұрақты табысқа жетіп, өз саласында жоғары абыройға ие бола алады.

– Сұхбат бергеніңізге көп рахмет!

– Сіздерге де рахмет! Өміріміз тәтті болсын!

Әдемі АМАНТАЙҚЫЗЫ