Өскемен қаласында «Балалық шақтың бояулары» атты балаларға арналған ойын-сауық шарасы ұйымдастырылды, деп хабарлайды Buqara.kz сайтының тілшісі. 

Көпшіліктің көңілін көтерген мерекелік бағдарламада ән, би және түрлі интерактивтер өтті. Алаң түрлі-түсті көбелектер мен ноталар бейнеленген жарқын баннермен безендіріліп, сахнаның сәнін аша түсті.

Музыкалық сүйемелдеуді дыбыс режиссерлері мен өнерпаздар атқарып, кешті әсерлі әрі қызықты етті. Қала тұрғындары мен қонақтары іс-шараға белсене қатысып, балғындармен бірге көңіл көтерді.

— Осындай шаралар жиі өтіп тұрса екен. Балалар ғана емес, ересектердің де көңіл-күйі көтеріліп қалды. Көптен бері көшеде осындай жылы атмосфераны сезінбеппін, — дейді қала тұрғыны Айзада Қанат.