25 шілдеде Oskemen Hub алаңында IT-сарапшы Максим Синельниковпен онлайн-кездесу өтті, деп хабарлайды Buqara.kz сайтының тілшісі. 

Максим — T Bank компаниясының Site Reliability Engineer және Яндекс компаниясының бұрынғы әзірлеушісі. Бұл митап хабтың білім беру бағдарламасының бір бөлігі ретінде ұйымдастырылып, өндірістік ортада жасанды интеллектіні қолдану тақырыбына арналды.

Іс-шараға жаңа бастаған әзірлеушілер де, тәжірибелі инженерлер де қызығушылық танытты. Кездесу барысында банктік инфрақұрылымға ірі тілдік модельдерді (LLM) енгізу, олардың шешетін міндеттері мен инженерлік командалардың тап болатын қиындықтары (үздіксіз жұмыс істеу, мониторинг және масштабтау мәселелері) кеңінен талқыланды.

Айта кетейік, Максим Синельников Oskemen Hub-ты алғашқы күндерінен бастап қолдап келеді және жергілікті қауымдастық алдында бұған дейін де бірнеше рет сөз сөйлеген. Оның кездесулеріне әрдайым технологияны терең түсіну мен практикалық тәсіл тән.

Максим SRE-командалардың жұмысын ұйымдастыру, AI құралдарын бизнес-процестерге енгізу тәжірибесімен бөлісіп, автоматтандыру мен адам қатысуы арасындағы тепе-теңдік пен этикалық мәселелерді де көтерді.

Кездесу ашық форматта өтті, сондықтан қатысушылар тікелей сұрақтар қойып, спикердің шынайы тәжірибесіне негізделген жауаптар ала алды. Сондай-ақ AI дамуы, SRE және инженерлік бағыттағы мансап жолдары, AI шешімдерін әзірлеу мен қолдауда жүйелі көзқарастың маңыздылығы сияқты тақырыптар қозғалды.

Мұндай іс-шаралар — Oskemen Hub-тың өңірлік IT-қауымдастықты дамыту бағытындағы жұмысының маңызды бөлігі. Біздің мақсатымыз — қатысушыларға білімге, тәжірибеге және технологиялық индустрияны қалыптастырып жатқан мамандармен байланыс орнатуға мүмкіндік беру.