28 тамыз күні Достық үйінің алаңында Конституция күні мен қала күніне орай ерекше форматтағы мерекелік шара — ретро-кеш ұйымдастырылды, деп хабарлайды Buqara.kz сайтының тілшісі. 

Шараның басты ерекшелігі — оның 1980, 1990 және 2000 жылдар стилінде өтуі. Ән мен би, ерекше киім үлгілері, сол дәуірдің музыкасы мен сәні — барлығы да көрерменді уақыт керуенімен өткен күндерге жетелегендей әсер қалдырды. 
Ұйымдастырушылардың айтуынша, бұл форматтағы кеш қала тұрғындары арасында танымалдылыққа ие болып, дәстүрге айналып келеді. 

— Бұл шараны біз үшінші жыл қатарынан өткізіп келеміз. Әр жылы қатысушылар саны артып, тұрғындардың қызығушылығы күшейіп жатыр. Осындай маңызды күндер қарсаңында халыққа мерекелік көңіл-күй сыйлау – біздің мақсатымыз, – дейді Өскемен қалалық Жастар ресурстық орталығының директоры Бақытжан Ерболқызы.

Кеш барысында танымал ретро әндер шырқалып, түрлі буын өкілдері ашық аспан астында би биледі. Сол кезеңнің әуендері мен костюмдері шараның шынайы атмосферасын толықтырып тұрды. Арнайы ұйымдастырылған фотозоналар да көпшіліктің көңілінен шықты. Кеңестік пәтер стиліндегі бұл жерде  ескі радиоқабылдағыштар, дискілі телефондар мен түрлі тұрмыстық заттар қойылған. 

- Мен биыл бірінші рет келіп отырмын. Шынымен өте жақсы бастама екен. Жастық шағым есіме түсіп, ескі әндерге билеп, бір серпіліп қалдым. Жастарға ғана емес, орта буын өкілдеріне осылай көңіл бөліп, керемет кеш ұйымдастырып жатқанына қуаныштымын, - деді қала тұрғыны Жазира Абаева. 

Мерекелік кештің тағы бір қызықты бөлімі — ретро автокөліктер көрмесі. Жергілікті коллекционерлер көрмеге бірнеше тарихи көлікті ұсынды. Жиналған жұрт сирек кездесетін «Волга», «Жигули» сияқты көліктерді тамашалап, суретке түсіп жатты. Кештің шарықтау шегі — костюмдер дефилесі. Әр жылдардың сәніне сай киінген қатысушылар сахнада өз образдарын паш етіп, сәнқойлар арнайы марапаттарға ие болды.