Облыс орталығында жұрт асыға күткен спорт нысаны – бассейн күрделі жөндеуден кейін қайта қолданысқа берілді, деп хабарлайды Buqara.kz тілшісі. 

Бұл нысан 2020 жылы қалалық әкімдіктің шешімімен «Самғау» мәдениет пен бұқаралық спортты дамыту орталығының қарамағына берілген.

Жөндеуге дейін мұнда 230 бала 16 оқу тобында жүзу сабақтарына қатысқан. Ал 2025 жылғы ауқымды жөндеу жұмыстары ғимаратты түбегейлі жаңартты. Қабырғалар әрленіп, керамогранит төселді, жылу және су құбырлары жүйесі түгелдей ауыстырылды, электр желілері тартылып, терезелер мен витраждар жаңартылды. Сондай-ақ желдету жүйесі орнатылып, жаңа бассейн жабдықтары сатып алынды. Ішкі әрлеу жұмыстары толық аяқталып, заманауи талаптарға сай ресепшн аймағы пайда болды.

– Атқарылған жұмыстар балалардың жүзуге қатысу мүмкіндігін арттырып қана қоймай, олардың физикалық әрі тұлғалық дамуына қолайлы жағдай туғызады. Жаңарған бассейн Өскеменде бұқаралық спорттың дамуына тың серпін береді, – деді Өскемен қаласының әкімі Алмат Ақышев.

Жаңа нысан алдағы уақытта қосымша жаңғыртулармен толықпақ. Жоспарда балалардың қауіпсіздігін күшейту үшін электронды рұқсат жүйесін енгізу, суды зарарсыздандыруды тұрақты жолға қою, ата-аналарға арналған жайлы күту аймағын ашу бар. Сонымен қатар спорттық разрядтарға жол ашатын дайындық бағдарламалары енгізіліп, түрлі жастағы балаларға қосымша секциялар ұйымдастырылады. Жаттықтырушылардың біліктілігі арттырылып, заманауи әдістемелер енгізілмек.