Бұл туралы дәл қазір өтіп жатқан “Altai Invest - 2025” форумында белгілі болды, деп хабарлайды Buqara.kz сайтының тілшісі. 

Облыс әкімі Нұрымбет Сақтағановтың сөзінше, соңғы жылдары елде көптеген өзгеріс болып, ірі жобаларды ашуға жаңа мүмкіндіктер туындады. 
— Форумның қайта жаңғыруы – аймақтың диалогқа ашық, ынтымақтастыққа және жаңа инвестицияға дайын екендігінің белгісі. Біз сарапшыларды, кәсіпкерлерді және инвесторларды дамудың басымдықтарын анықтау, идеялармен алмасу және жаңа перспективаларға жол ашатын жобаларды талқылау үшін біріктірдік, - деді аймақ басшысы. 
Белгілі болғандай, соңғы бес жылда Шығыс Қазақстанға 3 трлн теңгеге жуық инвестиция тартылды. Биыл қосымша 1 трлн теңге тарту жоспарлануда.
Облыста жалпы құны 100 млрд теңгеден асатын 11 инвестициялық жоба жүзеге асырылуда. Олар жүздеген жаңа жұмыс орнын ашып, өңірдің экономикалық негізін нығайтады деп күтілуде. 

Қымбат МУХАМАДИЕВА