Бүгін Өскемен гарнизоны 27943 әскери бөлімінің сарбаздары мен офицерлері Қарттар күніне орай «Қамқор» әлеуметтік үйіне арнайы барып, қарияларды мерекемен құттықтады, деп хабарлайды Buqara.kz.

Бұл бастама – аға буынға құрмет көрсетіп қана қоймай, жастардың рухани тәрбиесіне үлес қосатын игі іс. Кездесу барысында әскери қызметішлер қарттарға мерекелік сый-сияпаттарын табыс етіп, жылы лебіздерін білдірді. Сондай-ақ сарбаздар мен клуб үйірмелері дайындаған концерттік бағдарлама қонақтарға көтеріңкі көңіл-күй сыйлады. Ән мен күйге толы әсем кеш қарттардың жанын жадыратып, жүздеріне қуаныш ұялатты.

Әскери бөлім командирінің орынбасары, майор Мақсат Қалмырзаев өзінің құттықтау сөзінде үлкендерді құрметтеу – әр азаматтың басты парызы екенін атап өтті.

– Қарттар күні – баршамыз үшін ерекше мереке. Қарияларымыздың өмірлік тәжірибесі мен ақ батасы – сарбаздарға үлкен өнеге. Бүгінгі іс-шараның мақсаты – ардагерлерге қуаныш сыйлап қана қоймай, сарбаздарымыздың бойына ізгілік пен аға буынға деген сыйластықты сіңіру. Осындай кездесулер жас ұрпаққа үлкен тәрбие береді, – деді ол.

Іс-шараға Өскемен гарнизоны әскери прокуратурасы басшысының орынбасары Арман Қалымов та қатысып, қарияларға жүрекжарды лебізін арнады.

– Баршаңызды Қарттар күнімен шын жүректен құттықтаймын. Қарияларға қамқорлық жасау – біздің азаматтық әрі адамгершілік міндетіміз. Сіздерге зор денсаулық, амандық және ұзақ ғұмыр тілеймін. Біз әрқашан сіздерге сүйеніш болуға дайынбыз, – деді Арман Қалымов.

Қамқорлық пен мейірімге толы бұл шара әлеуметтік үй тұрғындарының ғана емес, жас сарбаздардың да жүрегіне жылылық ұялатты. Қариялар өз кезегінде ұйымдастырушыларға ризашылықтарын білдіріп, сарбаздарға ақ батасын берді.