Оқу-жаттығуға орталық және жергілікті атқарушы органдардың, күштік құрылымдар мен жедел қызметтердің өкілдері қатысты, деп хабарлайды Buqara.kz сайтының тілшісі.

ҚР Қарулы күштері Бас штабының бастығы – Қорғаныс министрінің бірінші орынбасары генерал-лейтенант Сұлтан Қамалетдинов облыс әкімі Нұрымбет Сақтағановтың төрағалығымен өткен жиынға қатысты. Онда ведомствоаралық өзара іс-қимыл, түрлі қызметтердің күрделі жағдайларда бірлескен әрекеттерінің үйлесімділігі және халықты құлақтандыру тәртібі талқыланды.

Генерал-лейтенант Сұлтан Қамалетдинов жергілікті атқарушы органдардың іс-әрекетіне баға беріп, олардың ерекше жағдайларда жұмыс істеуге дайындығын атап өтті. Сонымен қатар азаматтарды уақтылы хабардар ету мен барлық құрылымдардың үйлесімді жұмысының маңыздылығына тоқталды.

Оқу-жаттығу аясында Бас штаб бастығы облыс әкімдігі жанындағы жедел-талдау орталығы мен шұғыл әрекет ету бойынша практикалық іс-қимылдар пысықталған оқу алаңдарын аралады.

– Мұндай оқу-жаттығулар барлық құрылымдардың дайындық деңгейін тексеруге, шынайы жағдайларда әрекет ету алгоритмдерін пысықтауға және одан әрі жетілдіру бағыттарын айқындауға мүмкіндік береді. Мемлекеттік органдардың келісімді әрі жедел жұмысы – азаматтардың қауіпсіздігінің кепілі, – деді генерал-лейтенант Сұлтан Қамалетдинов.

Нұрымбет Сақтағанов Қорғаныс министрлігінің өкілдеріне оқу-жаттығуды жоғары деңгейде ұйымдастырып өткізгені үшін алғыс білдіріп, мұндай іс-шаралардың өңір үшін ерекше маңызға ие екенін атап өтті. Оның айтуынша, бұл бірлескен іс-қимылдардың нақты тәртібін қалыптастыруға, дайындық деңгейін арттыруға және азаматтардың мемлекеттік органдардың кез келген қауіпке тиімді әрекет ете алатынына деген сенімін күшейтуге мүмкіндік береді.

Іс-шара қорытындысы бойынша дайындық деңгейін арттыру және анықталған кемшіліктерді жою жөнінде нақты тапсырмалар берілді.