Бұл туралы ШҚО бойынша Экономикалық тергеп-тексеру департаменті басшысының орынбасары Тимур Мұқанов мәлімдеді, деп хабарлайды Buqara.kz сайтының тілшісі.

Белгілі болғандай, өңірде жер қойнауын заңсыз пайдалануға қарсы іс-қимыл күшейтілді.
Биыл Ұлан ауданындағы Шыбынды және Самар ауданындағы Құлынжон өзендерінің аңғарларында бағалы металдарды заңсыз өндірудің екі фактісі тіркелді.
- Мемлекетке келтірілген залал 400 млн теңгеден асты. Тергеу барысында 6 келіден астам (380 млн теңге) алтын және 56 мың АҚШ доллары, кен өндіруге арналған техника тәркіленді. Заңсыз қызмет ұйымдастырушылары қамауға алынып, іс сотқа жіберілді, - деді Тимур Мұқанов.
Айта кету керек, ШҚО Экономикалық тергеп-тексеру департаменті алдағы уақытта да нақты экономикалық нәтижеге жетуге, активтерді қайтаруға, қаржылық процестердің ашықтығын арттыруға және мемлекеттің мүдделерін қорғауға бағытталған жұмысын жалғастырады.