Елдегі Полиция департаменттері өз автопарктерін жаңартуда. Көліктерді ауыстыру республика бойынша жүріп жатыр, ал Шығыс Қазақстан ең ірі сатып алушылардың біріне айналды, деп хабарлайды Buqara.kz сайтының тілшісі.

Мемлекеттік сатып алу порталының мәліметтеріне сүйенсек, ШҚО Полиция департаменті 6 млрд теңгеден асатын екі сатып алу науқанын жүргізуде.

Бірінші келісімшарт бойынша 4 млрд теңгеге Қазақстанда жиналған 198 көлікке тапсырыс берілді. Оларды Hyundai Trans Kazakhstan және Hyundai Trans Auto зауыттары жеткізуі тиіс. Сатып алу бес жылдық қаржылық лизинг бағдарламасы арқылы жылына 12,6 пайызбен және алғашқы жарнасыз жүзеге асырылады.

Екінші сатып алу бойынша шамамен 2 млрд теңгеге 83 көлік сатып алынбақ. 

Оған үш құрастыру зауыты қатысуда: Hyundai Trans Kazakhstan, SaryarkaAvtoProm және QazTehna. 

Сондай-ақ 27 млн теңгеге Yutong ZK6600D автобусы әкелінеді.

Барлық көлік құралын Өскеменге жеткізу келісімшарттарға қол қойылғаннан кейін 180 күн ішінде аяқталады деп жоспарлануда.