3 желтоқсанда Шығыс Қазақстан облыстық филармониясында Халықаралық мүгедектер күніне арналған «Рухты теңдік» аймақтық инклюзивті фестивалі ұйымдастырылады, деп хабарлайды Buqara.kz сайтының тілшісі.

Бұл туралы өңірлік коммуникациялар қызметі алаңында өткен брифингте облыстық зағиптар мен нашар көретіндерге арналған арнайы кітапхана директоры Бекайым Ұябаева мәлімдеді. Шара облыс әкімі Нұрымбет Сақтағановтың, облыстық Мәдениет басқармасы және облыстық зағиптар мен нашар көретіндерге арналған арнайы кітапхана қолдауымен бірлесіп өткізіледі. 
Фестиваль мақсаты сол, ерекше қажеттіліктері бар адамдардың шығармашылық әлеуетін дамыту, инклюзивті бастамаларды ілгерілету және толерантты қоғамды қалыптастыру. Шараға Өскемен қаласынан бөлек Глубокое, Ұлан, Шемонаиха, Катонқарағай, Тарбағатай, Күршім және Үлкен Нарын аудандарынан шығармашылық топтар келеді. 
- Қазір фестивальге 66 өтінім берілді, оның 39-ы облыс орталығы тұрғындарынан,  27-сі аудандардан түсті. Қатысушылардың ең көбі Тарбағатай  және Шемонаиха аудандарынан келмек. Фестиваль бірнеше санатты қамтиды. Оның ішінде, вокалдық және аспаптық орындау, түпнұсқа шығармалар (поэзия, ән, музыка), кескіндеме, қолданбалы өнер бар, - деді Бекайым Ұябаева. 
Анықталғандай, шараның жүлде қоры 4,5 миллион теңге. 20 қарашада облыстық арнайы кітапханада тәуелсіз қазылар алқасы бас қосты. Мәдениет және білім беру мекемелерінің сарапшылары шығармашылық жұмыстарды мұқият бағалап, сапасына, түпнұсқалығына және шеберлігіне назар аударды. Жеңімпаздар 3 желтоқсанда өтетін Гала-концертте белгілі болмақ. Фестиваль күні аймақтың шығармашылық салаларын дамытуды қолдау үшін сәндік-қолданбалы өнер туындыларының сатылымы мен көрмесі де өтеді.