Бүгін Д. Серікбаев атындағы ШҚТУ-да ШҚ Лингвистикалық орталығының ұйымдастыруымен ересектерге заманауи білім берудегі мүмкіндіктер талқыланды, деп хабарлайды Buqara.kz сайтының тілшісі.

Жасанды интеллект – жаңашылдық кепілі
Шараға облыстық Мәдениет басқармасының басшысы Самат Қасенов қатысып, тіл мамандарына алғысын білдірді.
– Барлықтарыңыз тіл маманысыздар. Қоғамдағы алатын орындарыңыз маңызды. Мемлекеттік тілдің дамуына үлкен үлес қосып келесіздер. Сіздермен жүздескеніме қуаныштымын. Егер қандай да бір бастамаларыңыз немесе ұсыныстарыңыз болса, айта беріңіздер. Мәдениет басқармасында түрлі мәдени шара көп өткізіледі, тілге қатысты жиындар да аз емес. Тіл үйрету – сауапты іс, сондықтан еңбектеріңізді жоғары бағалаймын, – деді Самат Қасенов.
Оның айтуынша, 2026 жылы 100 млн теңге көлеміндегі қаржыға ауқымды іс-шаралар ұйымдастыру жоспарланған. Сонымен қатар ол оқытушылар ұсынысына сәйкес анимациялық фильм түсіру бастамасын қолдады.
— Анимациялық фильм түсіруді құптаймын. Тарихи жерлер туралы түсірсек жақсы болар еді. Бізде көркем жерлер көп. Олардың ішінде Шілікті, Катонқарағайдың табиғаты қандай керемет. Бала қызықса, ата-анасы да қарайды. Сондықтан осындай идеяларды жүзеге асырайық, — деді ол.
Семинар басталар алдында әр ауданнан келген лингвистикалық орталық басшыларына басқарма атынан Алғыс хаттар табысталды.
Сәтімен өткен семинар оқытушыларға заманауи білім беру әдістерін үйретті. Жиын барысында лингвистикалық орталық мамандары оқытушыларға түрлі тақырыпта баяндамалар жасады. Орталық директорының орынбасары «Ересектерге заманауи білім берудегі оқытушылардың кәсіби шеберлігі мен құзыреттілігі» тақырыбында баяндама жасап, білім берудегі жасанды интеллекттің маңызына тоқталды.
– Біз дәстүрлі білім берумен қатар заманауи салаларға да көбірек көңіл бөлуіміз керек. Бұл туралы Мемлекет басшысы Қасым-Жомарт Тоқаев жолдауында атап өткен. Сондықтан әр ұстаз кәсіби шебер әрі құзыретті болуы тиіс, – деді ол.
Ырысты Райханқызы өз сөзінде оқытушылар қолдана алатын ЖИ құралдарымен таныстырды.
Ал орталық оқытушысы Балжан Серікбекқызы «Тілді үйретудегі Curipod платформасының тиімділігі» тақырыбында шеберлік сағатын өткізіп, платформа мүмкіндіктерін, қолдану тәсілдерін жан-жақты түсіндірді. Ләззат Қайдарова «Feiki AI нейрожелісін сабақ барысында қолданудың тиімділігі» бойынша шеберлік сабағын өткізіп, қатысушылардың эмоциясын анықтау бойынша практикалық тапсырмалар ұсынды. Сондай-ақ ол мемлекеттік тілді ересектерге оқытуда Canva платформасының артықшылықтарын көрсетіп, жүйеге кіру жолдарын таныстырды.
Жұлдыз Мұқанбаева «Қазақ тілі сабағында ЖИ қолданудың тиімділігі» тақырыбында шеберлік сағатын өткізіп, Genially платформасының мүмкіндіктерін таныстырды.
– Бұл бағдарлама арқылы презентациялар, суреттер, инфографикалар жасауға болады. Сонымен қатар аудиторияны қызықтыру үшін ойын механикасын қолдану тиімді, – деді ол.
Семинар соңында қатысушылар алған әсерлерімен бөлісіп, семинардың мазмұнды, келушілерге берері мол екенін атап өтті. Жиын оқытушыларға жаңа тақырыптар бойынша мол тәжірибе алуға мүмкіндік сыйлады.

Президент не айтты?
Естеріңізге сала кетейік, Президент Қасым-Жомарт Тоқаев халыққа Жолдауында Қазақстанға білім беру саласында түбегейлі жаңа тәсілдер қажет екенін айтты.
– Жаңа дәуірде мектеп жағдайы мемлекеттің дамуына тікелей ықпал етеді. Ал мектептің қандай болмағы ұстазға байланысты. Бүгінде педагогика саласы ғылымның ең маңызды тармағының біріне айналды. Сондықтан, бұл салаға түбегейлі жаңа көзқарас қажет. Заманауи технологияның көмегімен білім беру жүйесін жедел әрі тиімді жаңғыртуға болады. Біз білім саласын ең үздік халықаралық стандарттарға сай дамытуымыз керек, – деп түйіндеген Мемлекет басшысы.
Сондай-ақ, дәстүрлі республикалық Тамыз конференциясында да цифрлық технологиялар мен  жасанды интеллектінің маңызына тоқталған болатын.
– Білім беру үдерісіне цифрлық технологиялар мен жасанды интеллектіні жедел енгізу қажет. Әлем жаңа технологиялық дәуір­ге қадам басты. Оның басты нышанын инновацияның қарқынды дамуы мен жасанды интеллек­тінің өмі­рімізге дендеп енуінен байқауға бола­ды. Сондықтан бүгінде «озық ойлы ұлт» пен «технологиялық ұлт» ұғым­дары – егіз. Біздің міндетіміз – жаһан­дық үрдістерге бейімделу. Ол үшін білім беру жүйесіндегі цифрлық трансформацияның қарқынын үдету өте маңызды. Цифрландыру мен жасанды интеллектіні игеру білім саласындағы теңсіздікті еңсеріп, оқу сапасын айтарлықтай арттыруға үлес қосады, — деді Мемлекет басшысы.
Сондықтан, заманауи білім мен жасанды интеллекті білім беру жүйесінде ұтымды қолданудың маңызы зор.

Әдемі АМАНГЕЛДІ