Бүгін облыс орталығына ҚР Өнеркәсіп және құрылыс вице-министрі Иран Шархан мен Экология және табиғи ресурстар вице-министрі Жомарт Әлиев келіп, тұрғындармен кездесті, деп хабарлайды Buqara.kz сайтының тілшісі. 

Ведомство өкілдерінің сапары өңірдегі өзекті мәселелерді талқылап, халықпен ашық форматта пікір алмасуға арналды.
Жиынға ШҚО әкімінің орынбасары Дархан Сапанов пен Өскемен  басшысы Алмат Ақышов та қатысты. Кездесу барысында өңірдің әлеуметтік-экономикалық дамуы, өнеркәсіптік әлеуеті, құрылыс қарқыны, геология мен жер қойнауын тиімді пайдалану, экологиялық жағдайды жақсарту бағытындағы атқарылып жатқан жұмыстар жан-жақты талқыланды.
- Бүгінде Шығыс Қазақстан ел экономикасының дамуына зор үлес қосуда. Табиғаты бай, пайдалы қазбалар қоры мол аймақта тау-кен өнеркәсібі маңызды орын алады. Қазір облыс аумағында 300-ге жуық жер қойнауын пайдаланушы бар. Әлеуеті жоғары болғандықтан, осы салаға көп көңіл бөлудеміз, - деді ҚР Өнеркәсіп және құрылыс вице-министрі Иран Шархан.
Ашық диалог барысында азаматтар пайдалы қазбаларды қазу және игеру, заңсыз жер қойнауын пайдалану фактілері, геологиялық барлау жұмыстарын жүргізу сынды мәселелерді көтерді. Сонымен қатар қала тұрғындары біраз уақыттан бері талқыланып келе жатқан “Diamond” тұрғын үй кешеніне қатысты жағдайдың қалай шешілетініне қызығушылық танытты.
– Біздің Шығыс Қазақстанға келудегі басты мақсатымыз – Президент Әкімшілігі мен Үкімет аппаратының тапсырмасына сәйкес, өңір халқымен кездесіп, экологиялық мәселелерді шешу жолдарын талқылау. Бұл ретте министрлік пен жергілікті атқарушы органдардың жұмыстарын саралап, алдағы жоспарларды нақтылау маңызды, – деді ҚР Экология және табиғи ресурстар вице-министрі Жомарт Әлиев.
Кездесу соңында екі вице-министр азаматтарды жеке қабылдап, олардың шағымдары мен ұсыныстарын тыңдап, тиісті ведомстволарға жолданатын тапсырмаларды белгіледі.

Қымбат МУХАМАДИЕВА