«AMANAT» партиясының өкілдері аудандық аурухананың бас дәрігерімен Волчанка ауылында партияның сайлауалды бағдарламасының жол картасы аясында салынып жатқан дәрігерлік амбулаторияның құрылыс барысына мониторинг жүргізді, деп хабарлайды Buqara.kz сайтының тілшісі.

Мониторинг барысында бірқатар маңызды мәселе анықталды. Нысан басында тек екі жұмыскер болғанымен, олардың ешқандай жұмыс атқара алмай отырғаны белгілі болды. Себебі ғимаратта жылу жүйесі қосылмаған, нәтижесінде құрылыс жұмыстары тоқтап тұр.

Сонымен қатар амбулаторияның құрылысының сапасы сын көтермейтіні анықталды. Кейбір бөлмелерде қабырға плиталары түсіп қалған, терезелердің айналасы қуыстанған, еденге төселген линолеум талапқа сай келмейді, нысанда электр қуаты қосылмаған, сондықтан жылу жүйесі де іске қосылмаған.

Тексеру нәтижесі әлеуметтік маңызы жоғары нысанда құрылыс жұмыстарының тиісті деңгейде ұйымдастырылмағанын көрсетті. Тапсырыс беруші тарапынан бақылаудың жүйелі жүргізілмегені де байқалады.

Амбулатория құрылысы «AMANAT» партиясы Шемонаиха аудандық филиалының және ШҚО филиалының партиялық бақылау комиссияларының күнделікті назарында болады. Партия өкілдері аталған кемшіліктерді жою және нысан сапалы әрі уақытылы аяқтау бойынша тиісті органдарға нақты ұсыныстар жолдамақ.