Өңірде «Қолжетімді интернет» ұлттық жобасы аясында географиялық тұрғыдан еңбекпен жететін және халқы аз 30 елді мекенде спутниктік интернетке қосу жұмыстары толық аяқталды, деп хабарлайды Buqara.kz сайтының тілшісі.

Жобаның іске асырылуы шалғай ауыл тұрғындарына жаңа мүмкіндіктер ашып, заманауи цифрлық қызметтерге қолжетімділікті айтарлықтай кеңейтеді. Спутниктік интернетке қосылу өңірдің цифрлық инфрақұрылымын дамытуда, халықтың өмір сапасын арттыруда және қала мен ауыл арасындағы цифрлық алшақтықты қысқартуда маңызды қадам болып отыр.

ҚР Жасанды интеллект және цифрлық даму министрлігінің АО «Jusan Mobile» компаниясымен әріптестігі аясында, Шығыс Қазақстан облысы әкімдігінің және ШҚО Цифрландыру және архивтер басқармасының қолдауымен OneWeb спутниктік терминалдарының барлық 30 жиынтығы орнатылып, қосылды. Терминалдар секундына 50 Мбит-ке дейінгі жылдамдықты қамтамасыз етеді, ал қамту радиусы — 100 метр. Бұл технология өңірдің шалғай және қиын жететін ауылдарында тұрақты интернет орнатуға мүмкіндік берді.

Қоғамдық Wi-Fi нүктелері әрбір елді мекенде арнайы белгіленген орындарға орналастырылған. Тұрғындар осы аймаққа келіп, қысқа тіркеуден өтіп, Wi-Fi желісіне тегін қосыла алады.

Спутниктік терминалдар төмендегі елді мекендерде орнатылды:

• Алтай ауданы: Восточное, Дородница, Северное, Богатырева, Александровка, Березовка;

• Зайсан ауданы: Шыршытсу, Қарасай, Қабырғатал, Жінішкесу;

• Глубоков ауданы: Веселое, Қарагужиха;

• Риддер қаласы: Поперечное;

• Самар ауданы: Шұбарқайың;

• Күршім ауданы: Қайнар, Кістау-Күршім (Күршімкістауы);

• Марқакөл ауданы: Күнгей-Бөкенбай, Теріскей-Бөкенбай, Балықтыбұлақ, Шағанатты:

• Катонқарағай ауданы: Мойылды, Ақмарал, Рахман қайнарлары, Өрнек;

• Үлкен Нарын ауданы: Сенное;

• Ұлан ауданы: Манат;

• Тарбағатай ауданы: Сарыөлең, Ахметбұлақ, Жанаталап;

• Шемонаиха ауданы: Кандыковка.

Жобаның жүзеге асуы шалғай ауыл тұрғындарының заманауи интернет қызметтерін пайдалану мүмкіндіктерін кеңейтіп, өңірдің цифрлық инфрақұрылымын одан әрі дамытуға әсерін тигізуде.