Бүгін «Алтай» көтерме-бөлшек сауда орталығының алаңында Тарбағатай ауданының ауыл шаруашылығы жәрмеңкесі ұйымдастырылды, деп хабарлайды Buqara.kz сайтының тілшісі.

Іс-шара облыстық «Туған жер – алтын бесігім» жобасы аясында қолға алынып, ауданға қарасты ауылдық округтердің ірі шаруашылықтары мен кәсіпкерлері өз өнімдерін қала тұрғындарына ұсынды.

Маңырақ ауылынан келген кәсіпкер Айгүл Масаева жәрмеңкеге сапалы жылқы етін жеткізгенін айтты.

– Маңырақ ауылынан келдік. Жылқы етін 3200 теңгеден сатып жатырмыз. 4 жылқының етін әкелдік. Өте сапалы, дәмді. Сауда жақсы жүріп жатыр, – деді ол.

Аудан әкімінің орынбасары Марат Қызов іс-шараның мазмұнына тоқталып өтті.

– Кеше облыстық филармонияда концертімізді өткізсек, бүгін жәрмеңкемізді ұйымдастырып жатырмыз. Оған ауданымыздың таза өнімдерін әкелдік. Оның ішінде 4 тоннаға жуық сиыр еті, 1,5 тонна жылқы еті, 1 тонна балық өнімдері бар. Барлығы арзан бағада саудаланып жатыр, – деді ол.

Жәрмеңкеге келген қала тұрғындары бағалардың қолжетімді екенін атап өтті.

– Бағасы көңілге қонымды. Базарда етті 3500 теңгеге аламыз. Кейде сүрленген ет беріп жібереді. Мұнда 3100 теңгеден сатып жатыр. 2 келі жылқы етін алдым, - деді қала тұрғыны Алмагүл Қайратқызы.

Жәрмеңке барысында ұлттық ойындардан жарыстар ұйымдастырылып, әуезді әндер шырқалды.