Бүгін Шығыс Қазақстан лингвистикалық орталығында мемлекеттік тілдің қолданыс аясын кеңейтуге бағытталған тіл сайысы ұйымдастырылды, деп хабарлайды Buqara.kz  сайтының тілшісі.

Іс-шараны ШҚО Мәдениет басқармасының ШҚ Лингвистикалық орталығы өткізді.

- Құрметті тіл жанашырлары, қатысушылар, қазылар алқасы, баршаңызды 16 желтоқсан - Тәуелсіздік күнімен құттықтаймын! Бүгінгі байқаудың басты мақсаты – мемлекеттік тілді дәріптеу, тіл үйренушілердің белсенділігін арттыру, қызметкерлерді ынталандыру және ұлттық құндылықтарды кеңінен насихаттау. Қатысушыларға сәттілік тілеймін! - деді ШҚ Лингвистикалық орталығының директоры Әсемгүл Абзалова.

Сайыс төрт кезеңнен тұрды:

1 кезең – Өзін таныстыру. Қатысушыларға 2 минут ішінде өздерін еркін форматта таныстыруға мүмкіндік берілді.

2 кезең – «Сұрақ-жауап». Ақын-жазушылар шығармашылығына қатысты сұрақтар қойылып, қатысушылар білім деңгейін көрсетті.

3 кезең – «Тіл – бәйге». Тәуелсіз Қазақстан тақырыбындағы суреттер бойынша әңгіме құрастыру тапсырылды.

4 кезең – «Тіл – мәдениет». Қатысушылар өз өнерлерін көрсетіп, шығармашылық қабілеттерін танытты.

Байқау қорытындысы бойынша жеңімпаздар мен жүлдегерлер арнайы дипломдармен, алғысхаттармен және бағалы сыйлықтармен марапатталды.

Іс-шара мемлекеттік тілді өркендетуге үлес қосып, қатысушылардың тілге деген сүйіспеншілігін арттырды.