Бүгін Өскеменде Әлеуметтік диалог орталығының салтанатты ашылуы өтті, деп хабарлайды Buqara.kz сайтының тілшісі.

Іс-шараға облыс әкімі Нұрымбет Сақтағанов, ҚР Еңбек және халықты әлеуметтік қорғау бірінші вице-министрі Асқарбек Ертаев және өңірдегі бірқатар кәсіпорын басшылары қатысты.
Салтанатты жиында сөз сөйлеген Асқарбек Ертаев әлеуметтік диалогты дамыту мемлекет саясатының басым бағыттарының бірі екенін атап өтті.
- Бүгін — іскер серіктестер мен мемлекеттік қызметшілер үшін маңызды күн. Әлеуметтік диалогтың басты мақсаты — қоғамдағы тұрақтылықты сақтау, еңбек өнімділігін арттыру және жұмыс беруші мен қызметкер арасындағы қарым-қатынасты нығайту. Осы мақсатта Өскеменде Әлеуметтік диалог орталығы ашылып отыр. Бұл нысан бизнес өкілдері арасындағы байланысты күшейтіп, еңбек саласындағы өзекті мәселелерді тиімді шешуге мүмкіндік береді. Министрлік тарапынан бұл бастама жан-жақты қолдауға ие болады, - деді ҚР Еңбек және халықты әлеуметтік қорғау бірінші вице-министрі  
Айта кетейік, бұл орталық республика бойынша Өскеменде алғаш рет ашылып отыр. Алдағы уақытта аталған тәжірибе өзге өңірлерге де енгізілуі мүмкін.

Әдемі АМАНГЕЛДІ