Қазақстан аумағындағы орман алқаптарының үлесі небәрі 5 пайызды құрайды. Сондықтан елдің «жасыл өкпесін» сақтаудың маңызы зор. Ал орман қорының 40 пайызы Шығыс Қазақстанда шоғырланған, деп хабарлайды Buqara.kz сайтының тілшісі.

Жыл соңында облыс әкімі Нұрымбет Сақтағанов сала мамандарына жаңа қызметтік техникалардың кілттерін табыстады.

Соңғы жеті жыл ішінде бюджет қаражаты есебінен жалпы сомасы 2 млрд теңгеден асатын 107 техника сатып алынған. Ал биыл Өнеркәсіпті дамыту қоры арқылы шамамен 4 млрд теңгеге 122 техника және облыстық бюджет есебінен 240 млн теңгеге 16 жоғары өтімді арнайы техника алынды. Бұдан бөлек, демеушілік қолдау да көрсетіліп жатыр.

Бүгін жаңа өрт сөндіру көліктері, «Беларусь» тракторлары, орман өртін сөндіретін шағын кешендер, автокөліктер мен мотоциклдер өңірдегі орман шаруашылықтарына тапсырылды. Бұл техника орманды қорғау, қызыл жалынның алдын алу, өрт шыққан кезде жедел әрекет ету және орманды қалпына келтіру жұмыстарына пайдаланылатын болады.

- Осы техникалар сіздердің жұмыстарыңызда сенімді серік болып, орманымызды қорғауға көмегін тигізсін. Бұл қадам еңбек жағдайларын жақсартуға және Шығыс Қазақстанның орман қорын қорғауға бағытталған. Сіздерге қауіпсіз қызмет тілей отырып, келе жатқан Жаңа жылдарыңызбен құттықтаймын!,- деді өңір басшысы Нұрымбет Сақтағанов.