ШҚО Полиция департаментінің бастығы Ерлан Омарбеков облыс тұрғындарымен кездесіп, ішкі істер органдарының өткен жылғы жұмыс нәтижелері туралы баяндады, деп хабарлайды Buqara.kz сайтының тілшісі.

Анықталғандай, 2025 жылдың қорытындысы бойынша Шығыс Қазақстан облысы елдегі қылмыс деңгейі бойынша 11 орында тұр. Сонымен қатар өңірдегі криминогендік ахуал тұрақты.

Қылмыстың жалпы саны да төмендеуде. Аса ауыр қылмыстар, ұрлық, қарақшылық және бопсалау фактілері айтарлықтай азайды. Қоғамдық орындарда, көшелерде және топ болып жасалған құқық бұзушылықтар саны қысқарды.

Есірткі қылмысына қарсы күреске ерекше көңіл бөлінуде. Өткен жылы 300-ге жуық есірткі қылмысы анықталып, заңсыз айналымнан 600 келіден астам есірткі құралдары мен психотроптық заттар тәркіленді.

Интернет-алаяқтық та өзектілігін жоғалтқан жоқ, алайда полицияның белсенді жұмысы мен заманауи технологияларды енгізудің арқасында жағдай жақсарды. 2025 жылы «Антифрод-орталық» жүйесінің көмегімен күмәнді транзакцияларды жедел бұғаттау мүмкін болды. Заңсыз шығарылмақ болған шамамен 15 млн теңгенің 11 млн теңгесі заңды иелеріне қайтарылды.

Оқиғалар мен қылмыстарға ден қою жеделдігін арттыру үшін барлық аумақтық бөліністе жаңа жедел басқару орталықтары (ЖБО) кезең-кезеңімен енгізілуде. Олар бейнебақылау жүйелерін, ЖҚЕ бұзушылықтарын автоматты түрде тіркеуді, іздеудегі автокөліктерді қадағалауды және GPS көмегімен полиция нарядтарын бақылауды қамтиды. Сондай-ақ облыс орталығында 20 «SOS» дабыл түймесі жұмыс істейді.

Кездесу барысында мал ұрлығы, ауылдық жерлерде қауіпсіздікті қамтамасыз ету, әйелдер мен балалардың құқықтарын қорғау, тұрмыстық зорлық-зомбылықтың, жасөспірімдер арасындағы буллинг пен кибербуллингтің алдын алу мәселелері қозғалды.

Бұдан бөлек, цифрлық технологияларды енгізу жалғасуда. Мобильді қосымшалар мен ұшқышсыз ұшу аппараттары полиция жұмысының тиімділігі мен ден қою жеделдігін арттыруға мүмкіндік береді.