Павлодарлық оқушы YC Startup School бағдарламасына қатысу үшін толық грант иеленіп, өз стартапына инвестиция тартты, деп хабарлайды Buqara.kz сайтының тілшісі BAQ.KZ сайтына сілтеме жасап.

Қазақстандық оқушы технология саласында халықаралық деңгейге шықты. Оның стартапын қазірдің өзінде мыңдаған адам қолданады, ал өзі әлемдегі ең танымал акселераторлардың біріне шақырту алды.

Павлодарлық 11-сынып оқушысы Игорь Мартынюк Орталық Азиядағы мектеп оқушылары арасында алғашқы болып Y Combinator ұйымдастырған YC Startup School білім беру бағдарламасына толық грант ұтып алды.

Бағдарламаның жасқа қатысты шектеулеріне қарамастан, ұйымдастырушылар оқушыны шақыру туралы шешім қабылдап, оның Кремний алқабына (Silicon Valley) ұшу, тұру және оқу шығындарын толық өтеп берді.

Игорь TabAI атты стартапты өз бетінше жасап шығарған. Бұл - жасанды интеллект негізіндегі көмекші құрал. Ол қолданушының цифрлық белсенділігін талдап, тапсырмаларды жүйелеуге және жұмыс процестерін басқаруға көмектеседі.

Жоба ақпараттық жүктеме мен көптапсырмалылықпен күресуге бағытталған. Бүгінгі таңда бұл сервисті бүкіл әлем бойынша 20 мыңға жуық адам қолданады.

Жоба қандай инвестиция тартты?
Стартап халықаралық қауымдастықтың назарын бірден аударды. Жоба 35 мың доллар көлемінде ангельдік инвестиция және инфрақұрылымды дамыту үшін Google компаниясынан грант алды.

Сонымен қатар, Игорь жасанды интеллект саласындағы ең жылдам дамып келе жатқан стартаптардың бірі - Cursor компаниясының ресми амбассадоры атанды. Ол бұл рөлде Қазақстан мен Орталық Азиядағы әзірлеушілер қауымдастығын дамытып, хакатондар, митаптар мен білім беру іс-шараларын өткізеді.

Болашақта оқушы өз өнімін әрі қарай дамытып, халықаралық акселерациялық бағдарламаларға қатысуды және Y Combinator-дың негізгі іріктеуіне өтінім беруді жоспарлап отыр.