«Жол активтері сапасының ұлттық орталығы» ШҚО филиалының мамандары өңірдегі басты туристік нысан — республикалық маңызы бар «Өскемен – Алтай – Үлкен Нарын – Катонқарағай – Рахман қайнарлары» автомобиль жолындағы жұмыс сапасына үздіксіз аспаптық және зертханалық бақылау жүргізуде.

Сарапшылардың басты назары — Рахман қайнарларына кіреберістегі 437–450 шақырым аралығындағы биіктаулы учаскеге аударылған. Мұнда асфальтбетон төсеу бойынша негізгі жұмыстар аяқталып, көлік қозғалысы ашылды. Тік жартасты еңістерге, қорық аймағының шектеулі жағдайларына және технологиялық тәртіптің қатаң талаптарына байланысты бұл учаске еліміздегі ең күрделі инженерлік жобалардың біріне айналды.

Осы 13 шақырымдық учаскеде екі жылға созылған құрылыс-монтаждау жұмыстары кезінде Сапа орталығының инженерлері 13 рет инспекциялық тексеруге шығып, жол-құрылыс материалдарынан 33 сынама алды. Зертханалық зерттеулер барысында небары екі ескерту тіркелді — олар қолданылған инертті материалдардың нормативтік-техникалық талаптарға сәйкес келмеуіне қатысты болды. Мердігер ұйым барлық кемшіліктерді дер кезінде жойып, негізгі асфальт төсеу көлемі басталғанға дейін материалдарды стандарттарға сай ауыстырды.

— Биіктаулы жердің өзіндік ерекшелігі - қателіктерді кешірмейді. Температураның күрт өзгеруі мен қар ерігенде  судың қуатты ағыны кез келген ақаудың бетін бірден ашады. Сондықтан мұндағы бақылау өте қатаң талаптар бойынша жүргізіледі. Ұлттық сапа орталығының оң қорытындысынсыз нысанды пайдалануға беру мүмкін емес. Екі жылғы құрылыс бойынша жүргізілген инспекциялар, материал сынамалары және берілген нұсқамалар туралы барлық деректер KazRoadLab бірыңғай цифрлық жүйесіне енгізіледі. Бұл мәліметтер мерзімсіз сақталады, оларды кейіннен өзгерту мүмкін емес. Жобаның бүкіл тарихы автоматты түрде көтеріледі. Барлық сәйкессіздіктер толық жойылғаннан кейін ғана қорытынды құжат беріледі, — деп атап өтті «Жол активтері сапасының ұлттық орталығы» ШҚО филиалының директоры Ержан Аязбаев.

Сонымен қатар, сапа қызметі орташа жөндеу жұмыстары бес бірдей учаскені қамтыған Алтайдан Рахман қайнарларына дейінгі бүкіл 165 шақырымдық трассаны жаңғырту барысын да қадағалап келеді:

— Жоба басталғаннан бері филиалдың жылжымалы зертханалары бағыт бойымен 120 инспекциялық тексеруге шықты;
 
— Жол-құрылыс материалдарынан (битум, қиыршықтас, топырақ және дайын асфальтбетон) алынған 612 сынама кешенді сынақтан өтті;

— Бастапқыда материалдардың 88 сынамасы нормативтік регламенттерден ауытқуды көрсетіп, оның 42 ескертуі жойылды;

— Жұмыс технологиясы бойынша 41 ескерту мен ақау анықталды, оның 31-ін бүгінде мердігерлер толығымен түзетті, қалғандары толық қалпына келтірілгенге дейін қатаң бақылауда тұр.

Қазіргі уақытта 437–450 шақырым аралығындағы учаскеде жолды абаттандыру — жол жиектерін нығайту, тосқауыл қоршауларын және жол белгілерін орнату бойынша соңғы жұмыстар жалғасуда. Филиал мамандары жолды пайдалануға қабылдаудың қорытынды актісіне қол қойылғанға дейін нысанға бақылау шығуларын жалғастыра береді.