ШҚО Сыбайлас жемқорлыққа қарсы қызметі тұрғындарды «Халық заңгері» акциясына шақырады

594
көрілім
Фотосурет zhaikpress.kz сайтынан

Шара мамыр айының 26-сы күні Сарсен Аманжолов атындағы Шығыс Қазақстан университетінде (Қазақстан көшесі, 55 мекен-жайы бойынша) «Халық заңгері» жалпыреспубликалық акциясы өтеді, деп хабарлайды Buqara.kz сайтының тілшісі.

Акцияның мақсаты – халықтың құқықтық сауаттылығын арттыру және тегін заң көмегін көрсету. Кез келген азамат облысымыздың үздік заңгерлерінен, мемлекеттік мекемелердің басшыларынан қажетті консультация ала алады. Олардың арасында белгілі адвокаттар, нотариустар, прокурорлар, тергеушілер, сот орындаушылары, мемлекеттік органдардың басшылары және басқалары бар. Яғни, азаматтар бір орында, тегін жеке мәселелеріне жауап ала алады.

- Акцияны ұйымдастырушылар – ҚР Сыбайлас жемқорлыққа қарсы іс-қимыл агенттігі, zakon.kz желілік басылымы, «Параграф» ақпараттық жүйесі, мемлекеттік билік органдары және Қазақстанның үздік заңгерлері мен адвокаттары, - делінген ақпаратта.

«Халық заңгері» акциясын өткізу дәстүрге айналды және қарапайым қазақстандықтар алғысын білдіруде. 2016-2022 жылдар аралығында акцияға 7000-нан астам үздік сарапшы және мемлекеттік органдардың шешім қабылдай алатын құзыретке ие өкілдері қатысты. Құқықтық көмекке жүгінген 150 000-нан астам азамат кеңес алды.

Шара кешкі сағат 17:00-де басталады.