Бұл туралы жуықта Өңірлік коммуникациялар орталығында өткен брифинг кезінде айтылды, деп хабарлайды Buqara.kz сайтының тілшісі.

Ресми ақпаратты ҚР Сыбайлас жемқорлыққа қарсы іс-қимыл Агенттігінің ШҚО бойынша Департаментінің басшылығы ұсынды. Анықталғандай, өңірде медициналық бұйымдар туралы мемлекеттік реестрге енбеген жабдықты балансқа қабылдап алу фактісі тіркелді.

– Өкініштісі сол, бұл құралдар республика шеңберінде қолданылмайды. Айталық, облыстық Денсаулық сақтау басқармасы Оңтүстік Кореяда жасалған 12 медициналық жабдық сатып алған. Оның жалпы сомасы – 35,1 млн теңге. Тиісті сертификаттың болмауы және оны қолдану мүмкіндігінің жоқтығына байланысты құралдар пайдаланылмай келеді, – деді ҚР Сыбайлас жемқорлыққа қарсы іс-қимыл Агенттігінің ШҚО бойынша Департаменті басшысы Денис Шакенов.

Мәлім болғандай, миллиондар бөлініп, сатып алған жабдықтар 2017-ші жылдан бері Оңалту орталығындағы жеке бөлмелердің бірінде сақталып тұр.

Әділхан ЕСІМХАНОВ