ҰБТ: 3500 бала шекті деңгейден өте алмады

58
көрілім
Фотосурет BAQ.KZ сайтынан.

Білім және ғылым министрлігі жоғары және жоғары оқу орнынан кейінгі білім департаментінің директоры Әділет Тойбаев ҰБТ алғашқы күнін қорытындылады, деп хабарлайды Бұқара.кз сайтының тілшісі BAQ.KZ-ке сілтеме жасап.


Оның айтуынша Қазақстанда ҰБТ енгізілгелі бері оған 1 млн 775 мыңға жуық адам қатысқан.


"Бірінші күн нәтижесін айтар болсам, тестілеу 6 өңірде орналасқан 39 пунктінде өткізілді. 13068 адам тест тапсыруға өтініш беріп, оның ішінде 12772 бала тестілеуге қатысты, бұл 97%. Өңірлерге жіберілген 500 мемлекеттік өкіл бақылауды қамтамасыз етті. Барлық 309 аудитория арнайы құралдармен жабдықталған. Аудиториялардан бейнетрансляция көрсетілді. Арнайы мониторлар орнатылып, тікелей трансляция жүргізілді", - деп айтты Тойбаев.


Департамент директоры 20 маусымда ұлттық тестілеу орталығының call-орталығына ҰБТ өткізу мерзімі, тамызда өтетін тестілеу және ҰБТ нәтижелері туралы қоңыраулар келіп түскенін айтты.


"Бірінші лек бойынша қатысушылардың 76,5% шектік деңгейден өтті. Ең жоғары 137 балл болды. Биылдан бастап әкімдіктердің ҰБТ нәтижесі бойынша рейтинг жасамауды сұрадық. Сол себепті орташа балл мен ең төменгі балл есептеген жоқпыз. Бүгін сағат 13:00 бастап апелляциялық комиссия жұмысын бастады. Жалпы ҰБТ бірінші күні штаттық режимде жақсы өтті", - деді ол.


ҰБТ алғашқы легінде республика бойынша 12772 мектеп түлегі тестілеуге қатысса, оның 11361 - қазақ тілінде, 1411 - орыс тілінде тапсырды. Алматы, Ақтөбе, Атырау, Маңғыстау, Түркістан облыстары бойынша бес пәннен орташа балл 74,2 құрады. Өту ұпайынан асқандар саны - 9338, ал шекті балл жинай алмағандар саны 3434 адамды құрады.


Оның айтуынша,ҰБТ нәтижелері @edu.gov.kz bot телеграм ботында, edu.mail.kz сайтында, Ұлттық тестілеу орталығының www.testcenter.kz сайтына жарияланды. Бұл үшін әр тапсырушы өзінің жеке тестілеу кодының нөмірін енгізу керек.