Оралхан Бөкейдің 80 жылдығы аясында Өскемендегі О.Бөкей атындағы қалалық кітапхана жазушылар және журналистер арасында «Неткен ғажап дүние!» атты көркем очерк байқауын жариялап отыр.
Оралхан Бөкей атындағы республикалық ІІ-әдеби публицистикалық байқауына еліміздің барлық аймағынан 25-45 жас аралығындағы жазушылар және БАҚ өкілдері қатыса алады. Қатысушы авторлық очеркіне сай тақырып қояды.
«Очерк мемлекеттік тілде жазылуы тиіс. Ұсынылған шығарма 15 беттен аспай (әріп өлшемі – 14, Times New Roman, 1,5 арақашықтығында), бұрын ешқайда жарияланбаған, кейіпкері – шынайы өмірде бар ауылдағы еңбеккер замандасымыз болуы қажет. Көркем тілде және сауатты жазылуына, тәрбиелік маңызына мән беріледі. Қазақстан Республикасы Заңына қайшы келетін, яғни ұлтараздықты, дінаралық алауыздықты тудыратын, зорлық-зомбылықты насихаттайтын, адамның ар-ожданына тиетін теріс пиғылдағы шығармалар байқауға қабылданбайды. Автор ұсынатын шығармасында аты-жөнін, жұмыс орнын, тұрғылықты мекенжайын, телефонын, электронды мекенжайын нақты көрсетуі тиіс. Әр автордан тек бір ғана жұмыс қабылданады», - деп хабарлады кітапхана қызметкерлері.
Шығармашылық жұмыстарды қабылдау осы уақыттан бастап 2023 жылдың 1 қыркүйегіне дейін жалғасады. Өз туындыларыңызды ukcbs@mail.ru электрондық поштасына жіберуіңізге немесе баспа түрінде кітапханаға әкеліп тапсыруыңызға болады. Жазушылар және журналистика саласының кәсіби мамандарынан құрылған қазылар алқасы жұмыстарды жан-жақты бағалайды. Соның қорытындысы бойынша жеті жеңімпаз марапатталады. Марапаттау салтанаты 28 қыркүйекте – Оралхан Бөкейдің туған күнінде жазушының туған өлкесі Катонқарағай ауданында өтеді.
