ШҚО-да Қазақстан халықтары Ассамблеясының мүшелеріне аймақтағы бірлік пен келісімді нығайтуға қосқан үлесі үшін «Достық үйіне 25 жыл» мерейтойлық медальдары табысталды.
Салтанатты іс-шара барысында Шығыс Қазақстан облысы әкімінің орынбасары Әсем Нүсіпова «Достық үйінің» 25 жылда бірлік пен келісім үйіне айналғанын атап айтты.
— Тура 25 жыл бұрын Өскеменде еліміздегі алғашқы Достық үйі ашылды. Осы жылдар бойы сіздер бірлік, бейбітшілік және жасампаздық жолында еңбек еттіңіздер. Бүгінде Сіздер еліміздің Президентінің «Рухани жаңғыру» бағдарламасындағы жобаларды жүзеге асыруға белсенді қатысып жатырсыздар. Сіздер облыстағы жас белсенділерге үлгі болып табыласыздар. Сіздерге атқарған жұмыстарыңыз үшін шын жүректен алғыс айтамын, — деді Әсем Нүсіпова.
Облыстық ҚХА, этномәдение бірлестіктердің мүшелеріне грамоталар мен «Достық үйіне 25 жыл» мерейтойлық медальдары, сондай-ақ, естелік сыйлықтар табысталды.
Естеріңізге сала кетсек, жуықта салтанатты мерейтойлық іс-шара барысында ШҚО әкімі Даниал Ахметов Достық үйіне Металлургтер Мәдениет үйінің тарихи ғимаратын беру туралы мәлімдеген болатын.
