Ақпанның аязды күндері аяқтала, Самарқанның көк тасымен бірге жібитін күн райы Шығыстағы өзен-көлдердің бетіндегі көк мұзды жұқартып, қозының терісіндей қабыршаққа айналдыратыны белгілі. Бұл әсіресе алты ай қыстың соңына қарай көк айдын бетіндегі мұз өткелі жабылып, айналма жолға кіріптар болып қалатын күршімдіктер үшін қиын кезең екені де рас. Десек те, наурыз айының соңына қарай көптен күткен жағымды жаңалық орнап, Күршім мен Көкпекті аудандарының арасын жалғайтын "Қызыл Ту" өткелінде паром қозғалысы басталады. Биыл да бұл дәстүр алған бетінен танбай, сәуір айының бел ортасынан бастап бір паром қос жағаны жалғап жүре бастады. Алайда, паром жұмысы басталар-басталмаста газет редакциясының телефонына тыным таптырмаған күршімдіктер бірде паром кіреберісінің жөнделмегенін алға тартса, енді бірде көлікті алып өту құны қымбаттаған паромның кестеге сай жүрмейтініне шағымданды. Осы себепті жол мұратын жоқтаған жолаушының мұңын назардан тыс қалдырмау мақсатында мәселенің мән-жайын біз де анықтап көрдік.

Жаңа қожайын келді

Биылдан бастап қос жағаны жалғайтын екі паромның қожайыны ауысты. Бұл жөнінде газет редакциясына ресми хатпен жауап берген "Қалқымалы өткел" ЖШС хабарлап отыр. Аталмыш ұйымның берген жауабына сүйенсек, биылғы жылдың наурыз айында өткен электронды тендерге сәйкес, екі паромды да "Құйған айлағы" ЖШС келешекте сатып алу мүмкіндігімен үш жылға жалға алған көрінеді.

- Қазіргі уақытта "Қызыл Ту" өткелінде екі паром бар, - дейді "Қалқымалы өткел" ЖШС басшылығы. - Бүгінде оның біреуі ғана жұмыс істеп тұр. Екіншісі 2018 жылдың 1-ші мамырынан бастап жұмысқа кіріседі. Екінші паромның кешігу себебі қысқы маусымда оны айлаққа қойған кезде бұрынғы қожайындары жөндеу жұмыстарын жүргізбеген. Сондай-ақ, паромның кіреберісі мен шығаберісіне де ешқандай жөндеу жүргізілмеген. Жөндеу жұмыстары тек біз қабылдап алғаннан кейін, яғни 14 сәуірден бастап қана қолға алынды.

Өткізу бағасы өсті

Паромның көліктерді алып өту бағасы биыл өткен жылмен салыстырғанда 6,9 пайызға қымбаттаған. Оның басты себебі, қосалқы бөлшек пен жанар-жағармайдың қымбаттығы.

- Екі паром 60 жылдан астам уақыт жұмыс істеуде, - деп қосты "Қалқымалы өткел" ЖШС басшылығы. - Осыншама жыл пайдалануда болған паромдардың көптеген қосалқы бөлшектері ескірген. Өкінішке қарай, кейбір қосалқы бөлшектер қазіргі уақытта зауыттарда жасалмайды. Ескіргендерін жаңарту үшін шет мемлекеттерден тапсырыспен алдырамыз. Сонымен қатар, теңгенің құлдырауы, жанар-жағармай бағасының өсуі де көліктерді алып өту бағасына әсер етіп отыр. Биылғы бағаны біз облыстық Жолаушылар көлігі және автомобиль жолдары басқармасымен келісіп қойдық.

Паромның сәуір айына арналған кестесінің 1 мамырдан бастап қайтадан өзгеріске ұшырайтынын хабарлаған мекеме басшылығы, алдағы уақытта қос паром жұмысы жолға қойылып, уақтылы қатынай бастайтынын айтты.

Азамат ТЕМІРБЕКОВ

"Күршім" және "Ертіс" паромдарының жұмыс кестесі

Паромның автокөліктерді алып өту бағасы

(өткен жылғы бағамен салыстырмалы түрде беріліп отыр)