Шығыс Қазақстан облысында коронавирустың «Кентавр» штамы тіркелген жоқ, деп хабарлайды Buqara.kz сайтының тілшісі.

ШҚО ақпарат орталығында өткен баспасөз мәслихаты барысында облыстық санитарлық-эпидемиологиялық бақылау департаменті басшысының орынбасары Сәуле Слямғазина өңірдегі коронавирус инфекциясының таралу қарқыны жайлы айтып берді.

«Эпидемиологиялық жағдайды бағалау матрицасына сәйкес Шығыс Қазақстан тұрақты түрде «жасыл» аймақта. CОVІD-19 науқастарын емдеуге арналған инфекциялық стационарлардағы төсек қорының қамтылу деңгейі – 0,7% құрайды. 1-19 шілде аралығында облыста коронавирустың 59 жағдайы тіркелген. Оның ішінде Өскеменде – 53 (89,8%), Глубокое және Ұлан аудандарында – 2, Самар, Шемонаиха аудандарында – 1. 100 мың тұрғынға шаққанда аурушаңдық көрсеткіші – 8,22 құрап отыр», - дейді ол.

Өңір аумағында COVID-19 белгілері бар пневмония жағдайлары жоқ. Коронавирустың жаңа «Кентавр» штамын жұқтырғандар тіркелмеген.

«Осы ретте, халық көп жиналатын орындарда медициналық маска тағуға кеңес береміз. Қоғамдық көлікте де маска тағып жүрген жөн», - дейді Сәуле Слямғазина.